Bulag ang katarungan sa Pilipinas!!!

Katinua’y nagpupumiglas, ibig tumakas sa kaisipan , nanlulumo na tila ay humihikbi sa masaklap na riyalidad , kararampot na sahod ng maralitang mga Juan  na buong araw ay kumakayod, masuwerte ng kumain ng tatlong beses sa isang araw ay kakaltasan pa rin ng sangkatutak na buwis na dudugasin lamang ng mga pulitikong alipin ng salapi at ang  mapait  pa ay nasasangkot ang ating Bise-Presidente sa katiwaliang ito. Ang mga Pilipinong magdamagang nagkukumahog sa ibayong dagat para sa inang bayan ay hindi rin nakakaligtas sa pangil ng kurapsyon na tila ay mga makamandag  na kamay, pilit na hinahatak ang mga pangarap ng mga Pilipino sa hukay ng matinding kahirapan. Mga pangarap na unti-unting nalalagas tulad ng mga dahong nawawalan ng saysay , inaanod ng delubyo ng pandarambong , dinudurog ng martilyo ng pananaksil hanggang ang buong bansa ay mawawalan ng pag-asa pang maka-ahon sa libingan ng nakaksukang gutom.

Sadyang kay lungkot nga naman maging  isang Pilipino , mga pulitikong tulad ng ating Bise-Presidente pati na rin ang kanyang mga kampon ay nagpapasarap ng buhay mula sa buwis ng mga mararangal na  mga Pilipino habang ang ating mga dakila at maprinsipyong mga sundalo ay nagbubuwis ng buhay araw-araw sa Basilan at Jolo upang masugpo ang bandidong Abu-Sayyaf para sa kapayapaan ng inang bayan . Nakikipag-digmaan para sa kaunlaran ng sambayanang Pilipino, subalit ang kanilang ipinaglalaban ay mau-uwi  lamang sa kadiliman sanhi ng  kurapsyon  sa pamahalaan.Sa kabila ng maingay na isyu sa mga telebisyon , radyo at social media  tungkol sa pandurugas  ng pangalawang pangulo ay nanatiling tahimik ang mga Juan, ayaw kumilos para sa kanilang kapakanan . Marahil ay naa-adik na  sa ihip ng pananaksil , nakikilitian sa latigo ng matinding gutom at nasasarapan sa halinghing ng mga pulitikong panay ang pandurugas sa kaban ng bayan. Para bang atin lipunan ay nakalubog sa mala-hayop na kaisipang social-darwinismo, matira ang matibay, aso ay kinakain ang kapuwa aso hinde baleng lahat ay maghihirap.

Ang  Pilipinas ay isang bigong demokrasya sapagkat ang mga batas nito ay ginagamit ng mga pulitikong kriminal , mga halimaw na handang gamitin ang dahas at salapi para maiwasan ang kalamigan ng kulungan at isang patunay ay ang mga Ampatuan na pumatay ng 58 na mga inosenteng  mamamahayag subalit ay kay lungkot isipin na hanggang ngayon ay tila kay ilap ng katarungan.  Gamit ang mga matatalinong mga abogado na para bang isang prostitusyon, kapalit ng malaking halaga ng pera ay makakalaya sa kaso ng pandarambong ang mga pulitikong magnanakaw. Sana nga ay hindi magbubulag-bulagan ang hustisya para mabigyan ng katarungan ang taong bayang napopoot na sa harapang pandurugas.